Udhëzuesi për Universitetet i “Turgut Ozal” synon të bëjë më të qartë për nxënësit tanë procesin e pranimit në universitete, sidomos në vendet që ata kërkojnë dhe aplikojnë shpesh.  

Ju lutemi, merrni pak kohë për t'u njohur me informacionet e dobishme  në këtë manual.

-Një hyrje në procesin e pranimit në universitet.

-Këshilla se çfarë mund të bëni për t'u përgatitur.

-Ndihmë për të ndërtuar një ese universiteti, që do të shfaqë pikat tuaja të forta.

-Ndihmë për t'u regjistruar për testet e standardizuara të kërkuara. 

-Këshilla për mundësitë e ndihmës financiare.

-Organizimin e takimeve me përfaqësues nga universitetet.

-Ofrimin e udhëtimeve në universitetet në vend dhe ato ndërkombëtare.

-Udhëzime se si të kërkojmë rekomandime për shkollat.

-Mbështetje me paraqitjet e 'Common App' dhe UCAS.

- Mbështetje për të përfunduar listat e universitetit.

-Mbledhja dhe dërgimi i të gjithë dokumentacionit të përshtatshëm, duke përfshirë transkriptet, letrat e rekomandimit, profilet e nevojshme për aplikim në universitetet që ju keni zgjedhur.

Fokusi për nxënësit e klasës së 10-të është në “shfrytëzimin” e mëtejshëm të pikave të forta, personalitetit dhe interesave të tyre.  Hulumtimet tregojnë se nxënësit që punojnë me pikat e tyre të forta kanë më shumë gjasa që të jenë nxënës të angazhuar e të motivuar dhe ka më pak të ngjarë të përjetojnë stres.  Për më tepër, nxënësit që njohin llojin e personalitetit të tyre, do ta kenë më të lehtë dhe do ta kuptojnë më mirë se si t’i bëjnë gjërat më efektive e më komode.

Pikat e forta, tiparet e personalitetit dhe aftësitë e një nxënësi luajnë një rol të madh për një proces të thellë të planifikimit akademik të individualizuar në klasën e 10-të.

Për të ndihmuar në krijimin e një plani akademik sa më të përshtatshëm, nxënësit e klasës së 10-të takohen rregullisht me mësuesit e tyre kujdestar dhe me këshilltarët e universitetit, të cilët plotësojnë inventarin në lidhje me interesat për universitet e karrierë dhe detaje rreth tipit të personalitetit.

Në klasën e 11-të, fokusi është në përmirësimin akademik dhe në planifikimin e të ardhmes arsimore, pas shkollës së mesme.  Kjo kohë hulumtimi është dhe koha kur nxënësi duhet të përqendrohet në procesin e të nxënit, në aspiratat e tij dhe të vetëvlerësojë me ndershmëri pikat e forta dhe të dobëta.  Kjo do t’i ndihmojë në procesin e kërkimit, në lidhje me opsionet që janë në dispozicion për ta.

Për ta arritur këtë, nxënësit do të takohen individualisht me  këshilltarin për universitetet, për të diskutuar rreth procesit të aplikimit, për detaje si: vendi/vendet në të cilat nxënësit duan të aplikojnë, lista e universiteteve që preferojnë, eseja, aplikimi e deklarata personale dhe zhvillimi i një plani testimi, nëse është e nevojshme.

Disa nxënës duhet të dorëzojnë dëshmi të testeve të standardizuara si pjesë e procesit të aplikimit (SAT, TOEFL, IELTS, etj).  Nxënësit duhet të punojnë me këshilltarin e tyre për universitetet në lidhje me një plan testimi.

Për shumicën e nxënësve të “Turgut Ozal”, klasa e 12-të është koha për aplikime.  Në varësi të vendit dhe kursit në të cilin po aplikojnë, afatet që vendosin universitetet variojnë  nga 15 tetori deri në korrik, pas diplomimit.  Nxënësit e klasës së 12-të ndjekin gjithashtu Student Success Course, një kurs javor i cili fokusohet në procesin e aplikimit në universitete.

Qëllimi i këtij kursi është që nxënësit të reflektojnë;  të demonstrojnë aftësitë, individualitetin, pikat e forta dhe karakterin e tyre; të aftësohen për të shpjeguar se si dhe pse ata janë kandidatë konkurrues për t'u pranuar në universitetet që kanë vendosur në listën e tyre të aplikimeve.